«Кіші бизнес соққы астында»: Азат Перуашев экологиялық тексерістердің жаңа қаупін айтты

Фото: akzhol.kz

Парламент қабырғасында экологиялық бақылау мәселесіне қатысты кезекті қызу талқылау өтті, деп хабарлайды Qazaqtoday.info.

Мәжіліс депутаты Азат Перуашев монополистер мен ірі кәсіпорындардың қоршаған ортаны ластауына қарсы күресті қолдайтынын білдіре отырып, ұсынылған жаңа түзетулердің астарында үлкен қауіп барын мәлімдеді.

Депутаттың сөзінше, заң жобасын бастамашылар бұл өзгерістер тек ірі алпауыттарға ғана қатысты деп сендіргенімен, іс жүзінде жағдай мүлдем басқаша болып тұр.

«Олар біз шағын және орта бизнесті мазаламаймыз, тек ірі кәсіпорындар туралы айтып отырмыз дейді. Бірақ олар енгізген және соңына дейін қорғап баққан түзетуде шағын, орта немесе ірі бизнес деп бөліп жару атымен жоқ. Ол жаппай бәріне қатысты», — деп ашынды депутат.

Бақылаусыз тексеріс дәуірі туа ма?

Перуашевтың айтуынша, бұл түзету қабылданса, экологияға қатысты кез келген тексеріс Кәсіпкерлік кодексінде бекітілген ортақ тәртіп пен ережелердің шеңберінен шығып кетпек. Бұл кәсіпкерлерді қорғайтын заңдық сүзгілердің жойылуына әкеп соғуы мүмкін.
Ең сорақысы, бұл ережеден еліміздегі ең кішкентай бизнес өкілдері де айналып өте алмайды.