Маңғыстаудағы Ыбықты Сай шатқалына аты-жөнін жазған ер адам ұсталды
Фото: Lada.kz
Маңғыстау облысында полицейлер Ыбықты Сай шатқалы аумағына жазу жазып кеткен ер адамды жауапкершілікке тартты. Бұл туралы QazaqToday.info ақпараттық порталы хабарлайды.
Әлеуметтік желілерге жүргізілген мониторинг барысында полиция қызметкерлері белгісіз ер адамның өзінің аты-жөні мен автокөлігінің мемлекеттік тіркеу нөмірін жазып кеткен бейнежазбаны анықтады.
«Жедел-іздестіру іс-шараларының нәтижесінде құқық бұзушының кім екені анықталды. Ол — 2005 жылы туған азамат. Ер адам ұсақ бұзақылық жасағаны үшін жауапкершілікке тартылды», — дейді полиция.
Іс материалы процестік шешім қабылдау үшін сотқа жолданды. Сонымен қатар құқық бұзушы жазған жазуларын өшіріп, аумақты бастапқы қалпына келтірді.
