Қостанай қаласында жылу желісін тексеру кезінде құбыр жарылып, су көпқабатты үйдің биіктігіне дейін атқылады. Куәгерлер түсірген оқиға видеосы әлеуметтік желіде тарады деп хабарлайды Qazaqtoday.info сайты.
Қалалық әкімдіктің мәліметінше, оқыс оқиға Чкалов көшесінде гидравликалық сынақтар жүргізу барысында болған. Магистральдық жылу желісі зақымданып, жылу камерасының люгі арқылы жүйедегі су сыртқа шыққан.
Мұндай тексеріс шаралары алдағы жылыту маусымына дайындық аясында ескірген және әлсіз құбырларды анықтау үшін қажет. Әкімдік өкілдерінің айтуынша, қазіргі уақытта мамандар апат салдарын жою жұмыстарын бастады, ақау шыққан аумақ қоршауға алынды.
