Алматыда екі жасөспірімнің өлімі: Полиция «Адам өлтіру» бабымен іс қозғады
Алматыда екі жасөспірім пышақ жарақатынан көз жұмды. Полиция «Адам өлтіру» бабымен іс қозғап, оқиғаға қатысы бар деген күдікпен 12 адамды ұстады.
Сурет: kz.kursiv.media
Алматы қаласының Алатау ауданында екі жасөспірім – Дінмұхамед Есенгелді мен Ешім Қасымбек пышақ жарақатынан қаза тапты. Аталған факті бойынша полиция департаменті «Адам өлтіру» бабымен қылмыстық іс қозғап, 12 адамды қамауға алды, деп хабарлайды Qazaqtoday.info сайты.
Қайғылы оқиға 30 сәуір күні болған. Марқұм Дінмұхамед Есенгелдінің анасы Гүлнұр Абдрасилованың айтуынша, 17 жастағы ұлы достарына баратынын айтып үйден шығып, қайта оралмаған. Анасы ұлының жүрегіне, бүйрегіне және арқасына бірнеше рет пышақ салынғанын айтады. Сондай-ақ ол бұған дейін белгісіз біреулердің ұлынан ақша бопсалап жүргенін және оқиғаға бір қыздың қатысы болуы мүмкін екенін жеткізді.
Куәгерлердің сөзіне сүйенсек, Дінмұхамед досымен бірге шабуылдаушылардан қашып, жолдағы үйлердің бірін паналамақ болған. Алайда ол көп қан жоғалтып, сол жерде есінен танған. Үй иесінің айтуынша, түнгі сағат екі шамасында жедел жәрдем бір жасөспірімді алып кетсе, екіншісін полиция қызметкерлері сол жерде тергеген. Ауладағы қан ізі екі күн бойы жатқаны да айтылды.
Қаза тапқан екінші жасөспірім – Ешім Қалдыбай. Оның әкесі Әнуар Қалдыбаев істің ақ-қарасы анықталғанша, тергеу нәтижесін күтетінін мәлімдеді. Алматы қалалық полиция департаменті бұл оқиғаға қатысты ҚР ҚК-нің 99-бабы («Адам өлтіру») және 293-бабы («Бұзақылық») бойынша сотқа дейінгі тергеу амалдары жүріп жатқанын хабарлады. Тергеу барысы қатаң бақылауға алынған.
