Павлодарда адамдарды Ресейге жүк көлігімен заңсыз тасымалдаған өзбекстандық ұсталды

Павлодар облысында жедел-іздестіру іс-шаралары барысында заңсыз көші-қон арнасының жолы кесілді. Өз отандастарын жүк көлігінің жасырын қуысына тығып, Ресейге заңсыз өткізбек болған Өзбекстан азаматы ұсталды, деп хабарлайды Qazaqtoday.info сайты.

Күдікті қылмыстық әрекетін жүзеге асыру үшін MAN маркалы жүк көлігін пайдаланған. Жедел уәкілдер көлікті тексеру кезінде адамдарды жасырын тасымалдауға арналған арнайы жабдықталған орынды анықтады. Көлік құралы тәркіленіп, арнайы тұраққа қойылды.

Павлодар облысы ПД Криминалдық полиция басқармасының бастығы Жаслан Танжановтың мәліметінше, аталған дерек бойынша «Заңсыз көші-қонды ұйымдастыру» бабымен қылмыстық іс қозғалды. Қазіргі уақытта оқиғаның толық мән-жайын анықтау және күдіктінің осыған ұқсас басқа да қылмыстарға қатыстылығын тексеру бойынша тергеу амалдары жүргізіліп жатыр.