Қазақстанда психологтарды коуч деп атау ұсынылды: жаңа ереже

Қазақстанда психологтардың бірыңғай тізілімі құрылып, олардың қызметіне қатысты жаңа кәсіби стандарт әзірленеді. Бұдан былай мамандар жұмыс бастар алдында клиенттен ақпараттандырылған келісім алуға және қызмет көрсету туралы келісімшарт жасасуға міндеттеледі, деп хабарлайды Qazaqtoday ақпарат агенттігі.

Бұл өзгерістердің қалай жүзеге асатыны және мамандарды даярлау ісінде нені өзгерту қажет екені туралы жоғары санатты психотерапевт Анар Қаражанова өз пікірін білдірді. Сарапшының айтуынша, психологиялық кеңес беретін барлық маманды бір санатқа жатқызуға болмайды.

«Егер өзін-өзі жұмыспен қамтыған психологтар отбасы, әлеуметтік бейімделу сияқты мәселелер бойынша кеңес берсе, онда «жаңа дүние ойлап табудың» қажеті жоқ деп ойлаймын. Бүкіл әлемде мұндай адамдарды коуч деп атайды», — дейді маман.

Осылайша, Қаражанова нарықтағы психологиялық қызметтерді нақты жіктеп, әрқайсысының өз стандартын бекіту маңызды екенін атап өтті. Бұл азаматтарды сапасыз қызметтен қорғауға және осы салаға деген сенімді арттыруға септігін тигізеді.

Фото: Әлеуметтік желіден