Күтпеген шешім: OpenAI өзінің атақты Sora нейрожелісін жауып тастады

Технология әлемін дүр сілкіндірген OpenAI компаниясы видео жасайтын Sora нейрожелісін жабу туралы шешім қабылдады. Бұл көпшілік үшін күтпеген жаңалық болды, деп хабарлайды Qazaqtoday ақпарат агенттігі.

The Wall Street Journal басылымының хабарлауынша, компанияның бас директоры қызметкерлерге Sora негізінде жасалған барлық өнімдер мен әзірлеушілерге арналған API нұсқаларына қолдау көрсету тоқтатылатынын мәлімдеген.

Sora жобасының X (бұрынғы Twitter) әлеуметтік желісіндегі ресми парақшасында да қоштасу жазбасы жарияланды. Онда жоба авторлары өз туындыларымен бөліскен барлық қолданушыға алғыс білдірген.

«Sora-мен қош айтысып жатырмыз. Оны пайдаланып, контент жасаған және қауымдастық құрған әрбір адамға алғыс айтамыз. Сіздердің туындыларыңыздың маңызы зор болды. Бұл жаңалық көңілдеріңізді қалдырғанын түсінеміз. Жақын арада қосымшаның және API-дің қашанға дейін жұмыс істейтіні, сондай-ақ жасалған жұмыстарды сақтап қалу жолдары туралы толық ақпарат береміз», — делінген ресми хабарламада.

Әзірге нейрожелінің жұмысы нақты қай күні толық тоқтайтыны белгісіз.

Фото: Әлеуметтік желіден