«Ақтөбе» футболшылары 8 наурызда тосынсый жасады: Луиш Нани де биге шықты

«Ақтөбе» футбол клубының ойыншылары 8 наурыз Халықаралық әйелдер күніне орай ерекше құттықтау жолдап, жанкүйерлерін таңғалдырды, деп хабарлайды Qazaqtoday ақпарат агенттігі.

Клубтың әлеуметтік желіде жариялаған видеосында футболшылардың ән айтып, би билегенін көруге болады. Тіпті команданың португалиялық жұлдызы Луиш Нани де өнер көрсетіп, көпшілік біле бермейтін тағы бір қырын танытты.

Бұл бейнеролик «Ақтөбе» әйелдер командасына арналған мерекелік құттықтау ретінде ұсынылған. Осылайша команда ұжымы нәзік жандыларға құрметін білдірді.

Жақында ғана португалиялық жартылай қорғаушы Қазақстан Премьер-лигасының бірінші турында «Тобыл» қақпасына нәтижелі пас беріп, командасының ірі есеппен (4:1) жеңуіне үлес қосқан еді.