Шымкенттегі бөгет құлауға шақ тұр: тұрғындар дабыл қағуда
Шымкенттің Майтас ықшамауданында Бадам өзеніндегі қорғаныс бөгеті опырылып жатыр. Тұрғындар үйлерін су басу қаупі барын айтып, алаңдаулы.
Шымкент қаласындағы Майтас тұрғын алабының халқы үлкен қауіптің алдында тұр. Бадам өзенінің бойындағы қорғаныс бөгетін су шайып, топырағының опырылуы салдарынан ондаған үйге қауіп төніп тұр, деп хабарлайды Qazaqtoday ақпарат агенттігі.
Әлеуметтік желіде тараған видеода өзен суының жағалауды мүжіп, бөгеттің бетон тіректерін ашып тастағаны анық көрінеді. Тұрғындардың сөзінше, өзен арнасы үйлерге тым жақын келіп қалған, ал көктемгі су тасқыны жағдайды одан сайын ушықтыруы мүмкін.
«Егер шұғыл шара қабылданбаса, келесі тасқында бүкіл ауылды су басуы мүмкін. Біз осы мәселені бірнеше рет көтердік, бірақ жауапты органдар құлақ асқан жоқ», — дейді жергілікті тұрғындар.
Бұл жағдай тек табиғи апат қана емес, сонымен қатар уақытында алдын алу шараларын қолданбаған жауапты мекемелердің салғырттығының көрінісі ретінде бағалануда. Халық бөгетті шұғыл түрде нығайтуды талап етіп отыр.
Фото: Әлеуметтік желіден
