Тоқаев АҚШ-тағы жастарға үндеу жасады: сіздерге зор үміт артамыз

Президент Қасым-Жомарт Тоқаевтың Америка Құрама Штаттарына сапары аясында Вашингтонда білім алып, еңбек етіп жүрген отандастарымызбен кездесуі өтті, деп хабарлайды Qazaqtoday ақпарат агенттігі.

Емен-жарқын әңгіме барысында Мемлекет басшысы шетелде білім алып, тәжірибе жинап жатқан өскелең ұрпаққа ерекше сенім артатынын жеткізді. Ол мемлекеттің жастарға әрдайым қолдау көрсететінін және олардың өз әлеуетін толық жүзеге асыруы үшін барлық жағдайды жасайтынын атап өтті.

«Біз сіздер сияқты білімді, талантты жастарға үлкен үміт артамыз. Елге оралып, жинаған білімдеріңізді Отанымыздың игілігіне жұмсайтындарыңызға сенімдімін», – деді Қасым-Жомарт Тоқаев.

Сондай-ақ Президент кездесуде сол кезде қолға алынған конституциялық реформалардың және жаңа Конституция жобасы бойынша өтетін жалпыхалықтық референдумның ел болашағы үшін тарихи маңызы зор екеніне тоқталды.

Өз кезегінде АҚШ-тың беделді оқу орындарында білім алып жатқан студенттер мен жас ғалымдар ғылым мен білім саласына көрсетіліп жатқан қолдау үшін Президентке алғыстарын білдіріп, өздерінің ұсыныс-пікірлерімен бөлісті.

Фото: Әлеуметтік желіден