Тоқаев: Ел тағдыры айқындалатын шешуші сәтте өмір сүріп жатырмыз

Мемлекет басшысы Қасым-Жомарт Тоқаев Волонтерлер форумында сөйлеген сөзінде қазіргі уақытты елдің болашағы үшін тарихи маңызды кезең деп атады, деп хабарлайды Qazaqtoday ақпарат агенттігі.

Президент былтырғы Жолдауында ұсынған саяси жаңғыру бастамаларына қоғамның кеңінен қолдау көрсеткенін атап өтті. Оның айтуынша, жарты жылдан бері конституциялық реформаға қатысты қызу талқылаулар жүріп жатыр.

«Партиялардан, депутаттар мен сарапшылардан, заңгерлер мен қоғам белсенділерінен мыңдаған ұсыныс келіп түсті. Онда мемлекеттің институционалдық негіздерін өзгертуден бастап, Ата Заңның мәтінін редакциялауға дейін, өте көп мәселе қамтылды», — деді Мемлекет басшысы.

Сонымен қатар, Тоқаев азаматтардың белсенділігін ескере отырып, Ұлттық құрылтайдың Қызылордадағы отырысында бірқатар жаңа бастаманы жұртшылық назарына ұсынғанын еске салды. Бұл өзгерістердің басты мақсаты – бүкіл мемлекетті басқару жүйесін тиімді, орнықты әрі теңгерімді ету.

«Барша әлем өзгеріп, заман бұлыңғыр болып тұрған қазіргі алмағайып кезеңде, бұл – өте маңызды мәселе», — деп түйіндеді сөзін Президент.

Фото: Әлеуметтік желіден