Қырғызстанның Ыстықкөл облысында Орталық Азиядағы ең ірі тау шаңғысы курортының құрылысы басталды. «Ала-Тоо Резорт» деп аталатын жаңа кешен жылына 2 миллионға дейін турист қабылдауға қауқарлы болады, деп хабарлайды Qazaqtoday ақпарат агенттігі.
Жоба Ақсу ауданында іске асырылып жатыр. Табиғи және жасанды қардың арқасында курорт жеті айға дейін үздіксіз жұмыс істейді деп жоспарланған. Бұл Орталық Азиядағы тау туризмі үшін маңызды жаңалық болып отыр.
Бірінші кезеңде құрылыс жұмыстары Жырғалаң, Боз-Ұшық және Ақ-Бұлақ аудандарын қамтиды. Осы жылдың желтоқсан айында алғашқы тау шаңғысы базасы мен алты аспалы жолды іске қосу көзделген.
Жоба авторлары мұны Қырғызстандағы халықаралық деңгейдегі алғашқы жыл бойы жұмыс істейтін кешен деп атап отыр. Ол аймақтағы туристік ағынды еселеп арттыруы мүмкін.
Фото: Әлеуметтік желіден
