Қостанай облысының полициясы Рудный қаласында болған кісі өліміне қатысты іздеуде жүрген екі жасөспірімді ұстады, деп хабарлайды Qazaqtoday ақпарат агенттігі.
23 қаңтар күні қаладағы көпқабатты үйлердің бірінен 19 жастағы жергілікті тұрғынның денесі табылған болатын. Марқұмның денесінде көптеген пышақ жарақаты болған.
Қылмысқа қатысы бар деген күдікпен кәмелетке толмаған екі адамға іздеу жарияланған еді. Қостанай облыстық Полиция департаменті жедел-іздестіру шараларының нәтижесінде екі күдіктінің де қолға түскенін растады.
«Жедел-іздестіру шаралары барысында екі күдікті де анықталып, ұсталды. Олар кәмелетке толмаған жасөспірімдер болып шықты. Қазіргі уақытта қамауға алынды», — деп хабарлады ведомствоның баспасөз қызметі.
Аталған дерек бойынша ҚР Қылмыстық кодексінің 99-бабы («Адам өлтіру») бойынша сотқа дейінгі тергеу амалдары жүргізіліп жатыр. Оқиғаның толық мән-жайы анықталуда.
Фото: Әлеуметтік желіден
