Банк картасы қауіпті болды: Алматыда алаяқтар енді үйге курьер жібереді

Алматыда интернет-алаяқтар жұмыс істеу схемасын өзгертті: енді олар ақшаны банк картасына аудартудың орнына, оны қолма-қол алдыру үшін «курьер» кейпіндегі сыбайластарын жіберетін болған, деп хабарлайды Qazaqtoday ақпарат агенттігі.

Алматы қалалық полиция департаменті Киберқылмысқа қарсы күрес басқармасы бастығының орынбасары Еркебұлан Қойшыбаевтың айтуынша, алаяқтардың бұл жаңа әдіске көшуіне банктердегі алаяқтыққа қарсы жүйелердің күшеюі себеп болған. Бөтен адамдардың атына ашылған карталарды («дроп-карта») пайдалану тиімсіз бола бастаған соң, олар осындай қадамға барып отыр.

«Алаяқтар бұрынғыдай ақшаны бөтен біреудің картасына аударудан бас тартып, қолма-қол ақша алу үшін сыбайластарын курьер ретінде жұмсайды. Бұл – қауіпсіздік жүйелерін айналып өтуге бағытталған әрекет», — деп түсіндірді Қойшыбаев.

Қазіргі таңда осы схема бойынша жұмыс істеген 20 мен 35 жас аралығындағы төрт күдікті ұсталды. Тергеу олардың басқа да қылмыстарға қатысы бар-жоғын тексеріп жатыр.

Жыл басынан бері Алматыда 2500-ден астам интернет-алаяқтық дерегі тіркеліп, келтірілген шығын көлемі 2,5 млрд теңгеге жеткен. Полиция қызметкерлерінің жедел әрекетінің арқасында оның 700 млн теңгесі зардап шеккендерге қайтарылды.

Фото: Әлеуметтік желіден