Қазақстанда 16 жасқа толмаған балалардың әлеуметтік желіге тіркелуіне тыйым салу мәселесі қарастырылып жатыр. Бұл бастаманы Үкімет отырысында Премьер-министрдің орынбасары – Мәдениет және ақпарат министрі Аида Балаева көтерді, деп хабарлайды Qazaqtoday ақпарат агенттігі.
Министрдің айтуынша, Мәдениет және ақпарат министрлігі онлайн-платформалар мен бұқаралық ақпарат құралдарының қызметін реттейтін арнайы заң жобаларын әзірлеген.
«Құжаттарда балалар мен жасөспірімдердің әлеуметтік желілерге қолжетімділігін шектеу және 16 жасқа толмағандардың аккаунт ашуына тікелей тыйым салу қарастырылған», — деді Аида Балаева.
Ведомство басшысы бұл заң жобаларының сараптамадан өтіп, қазір қоғам талқылауына шығарылғанын жеткізді.
Бастаманы іске асыру үшін билік пайдаланушылардың жасын тексеретін тетіктерді әзірлеп, талапты бұзғандарға қатысты жауапкершілік шараларын да анықтамақ.
Фото: Әлеуметтік желіден
