Нұрайдың ісі: Қызды қорғай алмаған Шымкент полициясының басшылары жұмыстан кетті
Шымкентте Нұрай Серікбайдың өлімінен кейін үлкен дау шықты. ІІМ тергеуінен соң полиция департаментінің басшысы мен орынбасары жұмыстан қуылды.
Шымкентте қаңтар айында қатыгездікпен өлтірілген Нұрай Серікбайдың ісіне байланысты қалалық полиция департаментінің басшысы мен оның бірінші орынбасары қызметінен босатылды. Бұл шешім ҚР Ішкі істер министрлігі жүргізген қызметтік тергеудің қорытындысы бойынша қабылданды, деп хабарлайды Qazaqtoday ақпарат агенттігі.
Еске салсақ, 11 қаңтарда Нұрай Серікбай пышақ жарақатынан көз жұмған болатын. Бұған дейін күдіктінің марқұм қызды үнемі қорқытып, артынан аңдығаны белгілі болды. Қыздың ата-анасы полицияға бірнеше рет шағымданғанымен, құзырлы органдар қылмыстық іс қозғамаған.
Қайғылы оқиғадан кейін Президент Қасым-Жомарт Тоқаевтың тапсырмасымен Ішкі істер министрлігі шұғыл қызметтік тексеріс бастаған еді.
ІІМ мәліметінше, құқықтық тәртіпті тиісінше қамтамасыз етпегені және өз міндеттеріне салғырт қарағаны үшін бірнеше полиция қызметкері де жұмыстан шығарылды.
«Қазіргі уақытта Өзіндік қауіпсіздік департаменті марқұмның туыстарының арыз-шағымдарын тиісінше қарамау дерегі бойынша соталды тергеу жүргізіп жатыр», — делінген министрлік хабарламасында.
Фото: Әлеуметтік желіден
