Көлік нарығы: Микрочип тапшылығы 2024 жылға дейін жалғасады

Автоөндіріс мамандарының микрочип 2023 жылы да тапшы болады деген мәлімдемесін Intel компаниясының басшысы Пэт Гелсингер растады. CNBC-ге берген сұхбатында ол «жартылай өткізгіш тапшылығы 2024 жылға ұласатынына» сенімді екенін айтты. Демек дағдарыс 2023 жылдың соңына дейін жалғасады деген сөз.

Бұған дейін сала мамандары жартылай өткізгіш жетпей жатқанына үнемі ковидке байланысты шектеулер мен тұрмыстық электроникаға, әсіресе смартфон, планшет және өзге де мобильді құрылғыларға сұраныстың артуын кінәлайтын, енді олар микрочип көп қолданылатын электромобиль көбейгенін айтады.

Биыл Еуропадағы күрделі геосаяси жағдай да чип өндірісіне кері әсер етеді. Мысалы, чип өндіруге қажетті лазер үшін неон керек, ал осы газдың ең ірі жеткізушілерінің қатарында Украина бар.