Танымал әзілкеш Ғалым Махамбет сегізінші рет әке атанатынын хабарлады
Белгілі әзілкеш әрі блогер Ғалым Махамбет жұбайымен бірге сегізінші сәбиін күтіп жүргенін жариялады. Әлеуметтік желіде тараған видео қоғамда түрлі пікір тудырды.
Сурет: sn.kz
Танымал әзілкеш, блогер Ғалым Махамбет сегізінші рет әке атанатынын мәлімдеді. Ол жұбайымен бірге гендер-пати форматында видео түсіріп, әлеуметтік желідегі парақшасында жариялады, деп хабарлайды Qazaqtoday.info сайты.
Отбасылық видеода ерлі-зайыптылар балаларымен бірге болашақ сәбидің жынысын анықтау сәтін көрсеткен. Қысқа уақыт ішінде жүз мыңдаған қаралым жинаған жазба желі қолданушылары арасында қызу талқыға түсіп, көптеген пікірге арқау болды.
Пікір білдірушілердің бір бөлігі көпбалалы отбасыға таңданысын білдіріп, әзілкештің жұбайының денсаулығына алаңдаушылық танытты. Олар жиі босанудың әйел ағзасына кері әсер етуі мүмкін екенін алға тартып, сыни пікірлерін жазды.
Сонымен қатар, көптеген қолданушы Ғалым Махамбеттің отбасына жылы лебізін арнап, болашақ сәбиге ұзақ ғұмыр, ал анасына мықты денсаулық тіледі. Олардың қатарында танымал тұлғалар да болып, әнші Гүлнар Мұрадимова «Жандарым» деп жазып, қолдауын білдірді.
