«Сыйлығын жариялау мақтаншақтық»: Төреғалидің қарындасы өзін сынағандарға жауап берді

Фото: видеодан скрин

Әнші Төреғали Төреәлінің қарындасы, блогер Дина Төрәлі үшінші сәбиін дүниеге әкеліп, көпбалалы ана атанды. Қуанышты сәтте жас ананың жанында анасы, әпкесі, ата-енесі мен жақын туыстары болып, немерелі болған қуанышты бірге бөлісті, деп жазады Qazaqtoday.info ақпарат порталы. 

Блогер әлеуметтік желідегі парақшасында туыстары тарту еткен сыйлықтарды — соңғы үлгідегі iPhone мен бренд сөмкелерді көрсетіп, әсерімен бөлісті. Алайда бұл жазбалар желіде түрлі пікір туғызды.

Кейбір қолданушылар «Байлар бірден сыйлық жаудырады», «Жеке өмірін көрсету — мақтаншақтық», «Сыйлықты жариялау артық» деп сын айтса, енді біреулері Динаның отбасындағы татулық пен жақындардың қолдауын үлгі етті.

Сынға жауап берген Дина Төрәлі сыйлықтан гөрі сыйластықтың маңызды екенін айтты.

«Біздің қарым-қатынаста ең құндысы — мейірім мен құрмет. Ақша мен дүние емес, бауырмалдық бірінші орында. Инстаграмда көріп отырғандарыңыз — өміріміздің небәрі бір бөлігі ғана. Камера үшін жасанды алғыс айтпаймыз, бізде көзге көрінбейтін, бірақ әлдеқайда қымбат сәттер көп», — деп жазды ол.

Сондай-ақ блогер өз өмірін қабылдай алмайтын жандарға да ой тастады.

«Егер бірдеңе ұнамаса, алдымен өзіңе қара. Мен өмірімді бар қалпында қабылдаймын, бақыттымын. Бала кезден ата-анам мен бауырларымның қамқорлығын көріп өстім. Үй де алдым, көлік те, қымбат әшекейлер де алдым. Бұған ұялатын ештеңе жоқ», — деді Дина.

Желі қолданушылары жазбаны әрқалай қабылдағанымен, көпшілік жас ананы құттықтап, сәбиіне амандық, отбасына береке тіледі.