Полицияда тәртіп жоқ па?! Атыраудағы департамент дәлізінде ер адам принтермен серуендеп жүр

Атырау облыстық полиция департаментінде түсірілген бейне қоғамда үлкен шу тудырды. Кадрда белгісіз ер адам қолына принтер ұстап, департаменттің дәлізімен емін-еркін жүргені анық көрінеді. Ешкім тоқтатпайды, ешқандай тексеріс те жоқ — бейнежазба жұрттың ашуын келтірді, деп хабарлайды Qazaq Today ақпарат порталы.

Бұл — жай ғана техниканы алып бара жатқан қызметкер ме, әлде ішкі бақылау жүйесінің істен шыққанын көрсететін көрініс пе? Қалай болғанда да, мұндай бейқамдық — мемлекеттік орган үшін үлкен абыройсыздық.

Қазір қоғамда бір ғана сұрақ туындап отыр: полиция өз ғимаратының ішіндегі тәртіпті қамтамасыз ете алмаса, онда қарапайым халықтың қауіпсіздігіне кім жауап береді?

Күн сайын жиналыстарда айтылатын «тәртіп», «жауапкершілік», «қатаң бақылау» қайда қалды?
Заңның үлгісі болуы тиіс органның өз ішінде бейберекет пен салғырттық орнағаны бейне арқылы айқын көрініп отыр.

Қоғам басшылықтан ресми түсініктеме күтеді:
— бұл не жағдай?
— мұндайға кім жол берді?
— бейнежазбадағы адам кім және ол қалайша еркін жүр?

Полиция халықтың сенімін жоғалтпау үшін бұл оқиғаға нақты жауап беруге тиіс. Әйтпесе, «тәртіп сақшыларының өзінде тәртіп жоқ» деген пікір бекіп барады.