«Жаңа оқушылар»: Әйгілі Backstreet Boys тобы домбырадан сабақ алды (ВИДЕО)

Әлемге әйгілі Backstreet Boys тобы Қазақстан астанасына келді. Әуежайда оларды жанкүйерлер мен қызметкерлер ерекше ілтипатпен қарсы алды. 

Әуежай қызметкерлері топтың атақты Everybody әніне би қойып, өнер көрсетті. Топ мүшесі Ник Картер бұл сәтті видеоға түсіріп, Threads парақшасында жариялады.

«Астана әуежайында таңертең бізді керемет қарсы алды. Қазақстандағы жылы лебіздеріңіз үшін шексіз ризамыз», – деп жазды ол.

Backstreet Boys концерті 21 қыркүйекте «Астана Арена» стадионында өтеді. Бұл шоу олардың әлемдік турнесінің бір бөлігі саналады.

Елорда әкімдігінің мәліметінше, Астанадағы концертке 45 елден 12 мыңнан астам турист келеді. Германия, Польша, Франция, Түркия, Финляндия, Литва, Чехия, Сербия, Әзербайжан, Өзбекстан және басқа мемлекеттерден жанкүйерлердің ағылуы күтілуде.

Бұдан бөлек Малика Хасенованың «Алтын домбыра» мектебі Бәйтерек монументінде әлемге әйгілі топқа домбырадан сабақ өткізіп, ұлттық аспапты танытты.