«Меркі ауруханасына барсаң, тірі шықпайсың: қан алмақ болған дәрігерлер баланың қолын сындырып жіберген
Коллаж: qazaq.today
Жамбыл облысының Меркі аудандық ауруханасында үлкен дау шықты. Әлеуметтік желіде тараған ақпаратқа сәйкес, медбикелер қан алу барысында сәбидің қолын сындырып жіберген, деп хабарлайды Qazaq.today ақпарат порталы.
Анасының айтуынша, бала 4 тамызда ішек инфекциясымен ауруханаға түскен. Бір апта бойы түрлі анализдер алып, дәрі тамызғанымен, жағдайы жақсармаған. Ал 11 тамыз күні сағат 16:00 шамасында екі медбике қан алу кезінде баланың қолын қатты қысып, нәтижесінде сүйегі шытынаған.
«Дені сау баланы ауру қылды. Алғашқыда өте көңілді, ойнақы болып келген ұлым қазір күле алмайды, ойыннан қалған», – дейді баланың анасы.
Бұл жағдайдан кейін әлеуметтік желіде үлкен резонанс туды. Пікір қалдырғандардың көбі меркілік дәрігерлерді кәсіби біліктілігі төмен, науқастарға жауапсыз қарайды деп сынға алды.
«Не деген сауатсыздық! Шаш ал десе, бас алатын мамандар!», – деп жазды желі қолданушыларының бірі.
«Меркі ауруханасына барсаң, тірі шықпайсың. Өміріңнен түңілгің келсе ғана бар», – дейді тағы бірі.
Алайда кейбір комментаторлар бұл ақпараттың асыра айтылғанын алға тартып, «ешқандай сыну болмаған» деп қорғап шықты.
Қазір бұл оқиға бойынша ресми органдардың түсініктемесі күтілуде. Ал ата-ана дені сау баланың мүгедек болып қалуынан қауіптеніп отыр.
