Семейде блогер жол ережесін қасақана бұзған
Фото: Абай облыстық ПД
Toyota Camry автокөлігін тізгіндеген 22 жастағы жүргізушісі жол ережесін бірнеше рет бұзған. Ол өзінің осы іс-әрекетін видеоға түсіріп, әлеуметтік желідегі парақшасына да жариялаған, деп хабарлайды Qazaq Today ақпарат порталы.
Аталған автокөлік алдыңғы мемлекеттік тіркеу нөмірлік белгісінсіз жүрген. Әрі оған пайдалануға тыйым салынған арнайы жарық құрылғылары да орнатылыпты.
– Блогер бір апта ішінде бірнеше ауыр құқықбұзушылық жасады. Атап айтқанда, жылдамдықты белгіленген шектен асырып, төрт жолақты жолда қарсы қозғалыс жолағына шығып, бағдаршамның тыйым салатын сигналына өткен. Сондай-ақ, маневр жасау қағидаларын бұзып, көлік жүргізу кезінде қауіпсіздік белдігін тақпаған және ұялы телефон қолданған, – деп хабарлады Абай облыстық Полиция департаменті.
22 жастағы жүргізушіге қатысты барлық құқықбұзушылық бойынша әкімшілік хаттамалар толтырылған. Бірқатар дерек бойынша іс сотқа жолданбақ. Ер адам көлік басқару құқығынан айырылып, ірі көлемде айыппұл төлеуі ықтимал.
