Қазақстан мүддесін қорғау бойынша халықаралық соттарда 17 іс қаралып жатыр
2024 жылдың бірінші жартысында Әділет министрлігі ұлттық заңнаманы дамытуға, азаматтар құқығын қорғауға, халықаралық ынтымақтастықты нығайтуға, сондай-ақ мемлекеттік қызметтерді цифрландыру мен автоматтандыруға арналған түрлі бағыттар бойынша жұмыс жүргізді, деп хабарлайды Todayinfo агенттігі.
Үкіметтің баспасөз қызметі Әділет министрлігінің биылғы бірінші жартыжылдықта атқарған жұмысы туралы шолу жасады. Мәселен, маңызды істердің бірі – құқықтық түсіндіру жұмыстары.
«Әділет министрлігі әзірленіп жатқан және қабылданған нормативтік құқықтық актілерді түсіндіру жұмыстарын күшейтті. Халықтың құқықтық сауаттылығын арттыру және азаматтарға тегін заңгерлік көмек көрсету мақсатында «Халық заңгері» республикалық акциясы ұйымдастырылды, оған 1,5 мыңға жуық заңгер маман қатысып, 150 мыңнан астам азаматқа көмек көрсетілді», – деді ведомство.
Бұған қоса, мемлекеттің мүлік құқығын қорғау бойынша жұмыстар атқырылды. Мемлекет мүддесін қорғау бойынша 20 іс жүргізу жұмысы жалғасуда, оның ішінде 13-і халықаралық төрелікте, 4-і шетелдік соттарда және 3-і сотқа дейінгі талқылауларда.
