Қуандық Бишімбаев Салтанат Нүкенованы қылқындырған — сарапшы

Фото: Жоғарғы сот

Сот-медициналық сараптама қызметкері Тахир Халимназаров Салтанат Нүкенова қандай жарақаттар алып, қалай қайтыс болғанын айтып берді, деп хабарлайды Qazaq Today ақпарат агенттігі el.kz-ке сілтеп.

Сарапшы осы салада 1991 жылдан бері қызмет атқаратынын да атап өтті. Оның айтуынша, Салтанат Нүкенованың мәйітіне қосымша талдау жүргізу қажет болған.

Сарапшы манекенге жарақаттарды салып көрсетті. Көкпен боялғандар — көгерген жерлер, қызыл — жаралар. Оның айтуынша, бетіне, бас сүйегіне 12-13 соққы тиіп, соның бәрі жиналып, өлімге әкеліп соққан. Сондай-ақ марқұмның мойынында қылқындыру белгілері байқалған.

«Бас аймағына бет пен ми, бас сүйек кіреді. Бірнеше соққыдан субдуральды гематома пайда болып, ол миын езіп тастаған. Ауыр дәрежедегі жарақаттар келтірілген. Құлағаннан мұндай жарақаттар пайда болмайды. Ол үшін адамды шашынан ұстап, қабырғаға соғу керек. Ол да соққы салуға жатады. Ал адам есін біліп, құлаған жағдайда барынша басын жарақат алудан сақтап қалуға тырысады», – дейді сарапшы.