Дәріні сақтау ережесін бұзған 48 медицина қызметкері жауапқа тартылды (ВИДЕО)
Ішкі істер министрлігі «Дәрмек» республикалық жедел-профилактикалық іс-шарасының қорытындысын жариялады, деп хабарлады Polisia.kz.
Арнайы операция барысында медициналық препараттарды пайдаланатын 900-ге жуық кәсіпорын мен ұйым тексерілді. Есірткі және улы заттар бойынша 22 қылмыс анықталды. 230 адам, оның ішінде 48 медицина қызметкері әкімшілік жауапкершілікке тартылды. 43 келі есірткі, психотроптық заттар мен дұрыс сақталмаған медициналық препараттың 15 мыңға жуық ампуласы тәркіленді.
Лицензиялау нормалары бұзылған және техникалық нығайту талабына сай келмейтін сақтау объектілеріндегі 3 мың тоннадан аса прекурсордың айналымы шектелді.
«Мысалы, Солтүстік Қазақстан облысындағы өнеркәсіптік объектілердің бірінде улы заттармен жұмыс істеу ережесінің бұзылғаны анықталды. Ол жерден 45 келі сынап тәркіленді. Сондай-ақ елордадағы медициналық ұйымдардың бірін тексеру кезінде есірткіні сақтау және жою ережесінің бұзылғаны анықталып, 350 ампула морфин тәркіленді. Мұндай құқықбұзушылық үшін 160 АЕК (590 мың 720 теңге, 1 АЕК – 3 692 теңге) мөлшеріне дейін айыппұл немесе 40 тәулікке дейін қамауға алу жазасы қарастырылған», – деді ІІМ ресми өкілі Шыңғыс Алекешев.
