Қырғызстан депутаты тіл мәселесінде Қазақстаннан үлгі алуға шақырды
Фото: 24.kg
Қырғызстанның парламент отырысында жоғарғы кеңес спикері Нұрланбек Шәкиев мемлекеттік тіл туралы заң қабылданғаннан кейін қырғыз тілінің мәртебесін көтеру керек екенін айтты, деп хабарлайды Qazaq Today ақпарат порталы 24.kg-ге сілтеме жасап.
Оның айтуынша, қырғыз тілін дамытуды балабақша мен бастауыш мектептен бастау керек.
«35 жыл бойы қырғыз тілі дамымады, мұны мойындауымыз керек. Тіпті көрші Қазақстанда 1-4 сыныпқа дейін тек қазақ тілі үйретіледі, басқа тіл жоқ. Біз де осындай қадамдарға баруымыз керек. Тағы бір мәселе, «Ыйман» пәні енгізілгенде, қырғыз және ағылшын тілі пәндерінің әрқайсысы бір сағаттан қысқартылды. Бұл қырғыз тіліне деген немқұрайлылық қой, басқа тілді үйрететін пәндерді қысқартуға болмай ма?» – деді депутат.
Нұрланбек Шәкиев барлық мемлекеттік қызметкерлер қырғыз тілін білуге міндетті екенін атап өтті.
