«700 млн»: Шымкентте мемлекеттің қаржысын жымқырған шенеунік қамауға алынды
Қаржы мониторингі агенттігінің аумақтық департаменті Шымкент қаласында бюджет қаражатын аса ірі мөлшерде жымқырды деген күдікпен тергеу жүргізіп жатыр. Күдікті ретінде , Әл-Фараби ауданы әкімдігінің лауазымды тұлғасы қамауға алынды, деп хабарлайды Qazaq.today ақпараттық агенттігі.
«Күдікті өзінің лауазымдық жағдайын пайдалана отырып, қала аумағындағы көпқабатты үйлердің 150 ауласын абаттандыру бойынша сметалық құжаттамада жұмыстар мен материалдардың бағасын негізсіз қымбаттатқан. Ол 700 млн теңгеден астам сомаға аса ірі мөлшерде бюджет қаражатын жымқырды деп күдіктелуде», — делінген агенттік хабарламасында.
Сот санкциясымен аталған азамат ұсталып, қамауға алынды. Қазіргі кезде сотқа дейінгі тергеу жалғасып жатыр. ҚР ҚПК-нің 201-бабына сәйкес өзге де ақпарат жария етуге жатпайды.
«ҚР Конституциясының 77-бабының 3-тармағының 1-тармақшасына және ҚР Қылмыстық-процестік кодексінің 19-бабының 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әркім кінәсіз деп есептеледі», — деп ескертеді агенттік өкілдері.
