Қазақстандық шахматшылар сеньорлар арасындағы әлем чемпионатында екі медаль алды

Фото: Казахстанская федерация шахмат

Сербияда өткен сеньорлар арасындағы әлем чемпионатында Қазақстан шахматшылары Мұртас Қажығалиев пен Петр Костенко екі медаль жеңіп алды. Қажығалиев әлем чемпионы атанса, Костенко 50+ жас санатында қола медальға қол жеткізді.

Бұл туралы Qazaqtoday.info сайты хабарлайды.

Қазақстандық спортшылар үшін шешуші кезең соңғы, 11-тур болды. Медаль үшін күреске Қазақстанның бес өкілі қатысты: Павел Коцур, Мұртас Қажығалиев, Петр Костенко, Серікбай Темірбаев және Ирина Буланова.

50+ санатында Қажығалиев өзінің отандасы Павел Коцурмен кездесті. Соңғы партия алдында екі шахматшының да 7,5 ұпайы болды. Жеңіс Қажығалиевке 8,5 ұпай жинауға, жақын қуушылардан жарты ұпайға озып, әлем чемпионы атағын жалғыз өзі иеленуге мүмкіндік берді.

Параллель кездесуде Петр Костенко Норвегия өкілі Максим Барт Стэнфордты жеңіп, турнирді сегіз ұпаймен аяқтады. Дәл осындай нәтижені болгар Кирилл Георгиев те көрсетті, алайда қосымша көрсеткіштер бойынша ол екінші орынды иеленіп, қазақстандыққа қола медальды қалдырды. Павел Коцур жарыс қорытындысы бойынша жетінші орында тұрақтады.

Айта кетейік, бұған дейін қазақстандық сеньорлар соңғы рет 2015 жылы пьедесталға көтерілген. 2015 және 2014 жылдары Павлодарлық Елена Анкудинова күміс медаль жеңіп алған. Ал 2013 жылы ол әлем чемпионы атанды. Одан бұрын, 1995 жылы алматылық Борис Каталымов екінші орынды иеленген. Содан бері қазақстандық спортшылар осы жас санатындағы жеке әлем біріншілігінің пьедесталына көтерілмеген.

Медальға жақын болған қазақстандық Ирина Буланова да 65 жастан асқан әйелдер арасында өнер көрсетті. Ол 7,5 ұпай жинады, алайда қосымша көрсеткіштер бойынша Сербия мен Польша қарсыластарына жол беріп, төртінші орынды иеленді. 65+ ерлер санатында Серікбай Темірбаев сегіз ұпай жинап, чемпионатты жетінші орынмен аяқтады, жүлдегерлерден небәрі жарты ұпайға қалып қойды.

Сеньорлар арасындағы әлем шахмат чемпионаты 3-14 қараша аралығында Сербияның Врнячка-Баня қаласында өтті. Жарысқа 384 шахматшы қатысты. Турнир классикалық уақыт бақылауымен швейцариялық жүйе бойынша 11 турдан тұрды.

Бұған дейін Бибисара Асаубаева әлемнің үздік төрт шахматшысының қатарына енгені хабарланған. Ол Будапештте өткен Total Chess World Championship Tour Pilot турниріндегі табысты өнерінің арқасында әлемдік әйелдер live-рейтингінде төртінші орынға көтерілді.