Тоқаев: «Өз» және «жат» деген бөліну болмайды, сыбайлас жемқорлыққа қатаң қарсы тұрамыз
Президент Қасым-Жомарт Тоқаев Қауіпсіздік кеңесінде сыбайлас жемқорлыққа қатысты қатаң мәлімдеме жасап, соңғы үш жылда 3 168 құқықбұзушылық анықталғанын хабарлады.
Фото: Акорда
Соңғы үш жылда елімізде 3 168 сыбайлас жемқорлық құқықбұзушылық анықталды. Бұл туралы Қазақстан Президенті Қасым-Жомарт Тоқаев Қауіпсіздік кеңесінің жедел кеңесінде мәлімдеді.
Бұл туралы Qazaqtoday.info сайты хабарлайды.
Мемлекет басшысының айтуынша, 2023–2025 жылдары мемлекеттік қызметшілер 2 165 сыбайлас жемқорлық құқықбұзушылық жасаған. Қалған жағдайлар басқа тұлғаларға, оның ішінде квазимемлекеттік сектор қызметкерлеріне тиесілі. Жалпы сомасы 248 миллиард теңгеден асты.
Президент ағымдағы жылдың он айының статистикасын да келтірді. Осы кезеңде Қазақстанда 751 сыбайлас жемқорлық құқықбұзушылық тіркелді. Оның 546-сын мемлекеттік қызметшілер, қалған 205-ін басқа тұлғалар, соның ішінде квазимемлекеттік сектор қызметкерлері жасаған.
«Осы статистикадан көрініп тұрғандай, сыбайлас жемқорлық жағдайы күрделі болып қалып отыр, бірақ біз түйеқұс сияқты басымызды құмға тығып, қоғамнан ештеңені жасырмаймыз. Біз осы саладағы ахуалды да, сыбайлас жемқорлықты тежеу үшін қабылданған немесе қабылданып жатқан шараларды да ашық айтамыз», – деді Тоқаев.
Мемлекет басшысы әртүрлі деңгейдегі басшылардың сыбайлас жемқорлық құқықбұзушылықтары туралы барлық хабарламаларды ҰҚК-нің Сыбайлас жемқорлыққа қарсы іс-қимыл қызметі Бас прокуратураның қатысуымен жедел тексеретінін атап өтті.
«Сондықтан әртүрлі деңгейдегі басшылардың сыбайлас жемқорлық құқықбұзушылықтары туралы барлық сигналдар ҰҚК-нің Сыбайлас жемқорлыққа қарсы іс-қимыл қызметімен Бас прокуратураның қатысуымен жедел әрі мұқият тексерілетін болады. «Өз», «өз емес» және әсіресе «жат» деген бөліну, әрине, болмайды. Біздің Конституциямыз барлық азаматтардың Заң алдында теңдігі қағидатын бекітті. Біз бұл талапты орындауға тиіспіз», – деп атап өтті президент.
Бұған дейін Тоқаев «Самұрық-Қазына» мен ҚТЖ басшылары ұсталғаннан кейін мәлімдеме жасаған болатын. Оның айтуынша, болған оқиға мемлекеттік компаниялардағы ауқымды сыбайлас жемқорлық туралы елеулі сигнал болды.
Президент сондай-ақ бұл «Заң және Тәртіп» тұжырымдамасы жарияланғаннан және осы қағидаттың Конституцияда мемлекеттік басқару мен қоғамдық өмірдің негіздерінің бірі ретінде бекітілгеннен кейінгі мемлекеттік компаниялардағы сыбайлас жемқорлық туралы алғашқы ірі іс екенін атап өтті.
Еске салайық, 2026 жылғы 11 қарашада Қазақстан ҰҚК-нің Сыбайлас жемқорлыққа қарсы іс-қимыл қызметі «Самұрық-Қазына» АҚ басқарма төрағасы Нұрлан Жақыповты және «Қазақстан темір жолы» ҰК АҚ басшысы Елжас Отыншиевті ұстады. Олар сыбайлас жемқорлық құқықбұзушылық жасады деп күдіктелуде. Алайда істің мән-жайы, оның ішінде күдіктің мәні, ұсталғандардың саны және тергеу басталуына негіз болған жағдайлар әзірге жарияланбай отыр.
