Бағдат Сабаз Астанадағы әлем чемпионатында қола медаль жеңіп алды

Фото: Дирекция развития спорта

Астанада өтіп жатқан грек-рим күресінен әлем чемпионатында қазақстандық Бағдат Сабаз қола медальға қол жеткізді. 67 келіге дейінгі салмақта үшінші орын үшін белдесуде ол Олимпиада-2024 қола жүлдегері әрі әлемнің екі дүркін вице-чемпионы әзірбайжандық Хасрат Джафаровты 8:5 есебімен жеңді.

Бұл туралы Qazaqtoday.info сайты хабарлайды.

Сабаз медаль үшін күресті жұбаныш раунды арқылы жалғастырды. Алдыңғы күні ширек финалда қазақстандық Олимпиада чемпионы әрі әлемнің қазіргі чемпионы ирандық Саид Эсмаилиге 2:7 есебімен жол берген еді. Ирандықтың финалға шығуы Сабазға жұбаныш торына түсуге мүмкіндік берді.

Бүгін, 27 қазанда, қазақстандық қытайлық Цзинь Синьсиньді 8:5 есебімен жеңіп, қола үшін күресу құқығын алды. Шешуші белдесуде Сабаз Джафаровтан да басым түсті.

Сабаздың қоласы Қазақстан құрамасының грек-рим күресінен өз алаңында өткен әлем чемпионатындағы үшінші медалі болды. Бұған дейін 55 келіге дейінгі салмақта Исхар Курбаев пен 60 келіге дейінгі салмақта Айдос Сұлтанғали үшінші орындарды иеленген.

Грек-рим күресінің қорытынды салмақ дәрежелерінде өнер көрсеткен қалған қазақстандықтар медальға жете алмады. Мейрамбек Айнағұлов (63 келіге дейін) украиналық Максим Люге 7:9 есебімен жол берсе, Нұрсұлтан Тұрсынов (87 келіге дейін) армениялық Геворг Тадевосянға 1:4 есебімен жеңілді.

Жұбаныш торы арқылы қолаға мүмкіндігін сақтаған Олжас Сырлыбай (130 келіге дейін) қытайлық Цзян Вэньхаоға 0:2 есебімен жеңіліп, турнирдегі өнерін аяқтады.

Бүгін сондай-ақ әйелдер арасындағы турнир басталды. Қазақстандық Зейнеп Баянова мен Нилуфар Раимова қола жүлделер үшін таласады.

Контекст. Күрестен әлем чемпионаты Астанада «Барыс Аренада» 24 қазаннан 1 қарашаға дейін шамамен 100 елден 900-ге жуық спортшының қатысуымен өтеді. Қазақстан ересектер арасындағы әлем біріншілігін 2019 жылдан бері алғаш рет қабылдап отыр. Біздің құрама 30 спортшыдан тұратын толық құраммен өкілдік етуде.