Қазақстанның батысында алғашқы қар жауды
Ақтөбе облысы мен батыс өңірлерде күздің алғашқы қары жауып, әлеуметтік желілерде бейнежазбалар тарады. Синоптиктер ауа райы құбылмалы болады деп болжап, полиция жүргізушілерді сақ болуға шақырды.
Сурет: Ашық дереккөз
Қазақстанда биылғы күздің алғашқы қары түсті. Ақтөбе облысы мен еліміздің батыс өңірлеріндегі бірқатар ауданда қар жауып, әлеуметтік желілерде ақ ұлпа басқан көшелер мен жолдардың бейнежазбалары тарай бастады.
Бұл туралы Qazaqtoday.info сайты хабарлайды.
Әсіресе Ақтөбе облысының Хромтау және Мәртөк аудандарында қар қалыңырақ жауған. Жергілікті тұрғындар жариялаған кадрлардан жолдар мен аулалардың біртіндеп ақ көрпеге оранғанын көруге болады.
Синоптиктердің болжамынша, өңірде ауа райы әлі де құбылмалы болады. Жаңбыр мен қар түріндегі мол жауын-шашын күтіледі. Солтүстік-батыс және батыстан соққан желдің екпіні кей жерлерде секундына 15-20 метрге дейін жетуі мүмкін.
Ауа райының нашарлауына байланысты полиция жүргізушілерді жолда барынша сақ болуға шақырды. Температураның төмендеуінен жол бетінде көктайғақ пайда болуы ықтимал.
