Астаналық әйел үйінен шыққанша, ұры пәтерін тонап үлгерген
Астанада полиция пәтер ұрлығын ашты. Қылмыс салдарынан жәбірленушіге 3,5 миллион теңгеден астам материалдық шығын келген, деп хабарлайды Qazaqtoday.info елордалық полиция департаментіне сілтеме жасап.
Полиция анықтағандай, елорда тұрғыны үйінен шығар кезде кіреберіс есіктің сыртында кілтін ұмытып кеткен. Үйіне оралғанда пәтердің ішінен бейтаныс ер адамды көрген.
Әйел есікті қағып, ер адамнан үйден шығуын талап еткен. Осыдан кейін ол есікті ашып, пәтерден жүгіріп шығып, бой тасалаған. Үй иесі бірден полицияға хабарласқан.
Тергеу барысында пәтерден зергерлік бұйымдар ұрланғаны анықталды. Олардың ішінде гауһар тастары бар төрт алтын сақина, үш алтын шынжыр және үш жұп алтын сырға болған. Жалпы шығын 3,5 миллион теңгеден асқан.
Жедел-іздестіру шаралары барысында полиция күдіктінің жеке басын анықтап, 25 жастағы ер адамды ұстады. Оның бұған дейін де осыған ұқсас қылмыс үшін жауапкершілікке тартылғаны анықталды.
Ұрланған заттарды полиция тәркілеп, иесіне қайтарды.
Қазіргі уақытта сотқа дейінгі тергеу жүргізіліп, оқиғаның барлық мән-жайы анықталып жатыр.
Полиция азаматтарды мүліктің қауіпсіздігіне мұқият болуға және кілтті құлыпта немесе оңай қолжетімді жерде қалдырмауға шақырады. Үйден шығар алдында кіреберіс есіктің берік жабылғанына, терезелер мен балкон есіктерінің құлыпталғанына көз жеткізу қажет. Қарапайым қауіпсіздік шараларын сақтау мүлікті сақтауға көмектеседі.
