Қазақстандықтардың орташа табысы 410 088 теңгеге жетті

Сурет: turkystan.kz

2026 жылдың екінші тоқсанында Қазақстан халқының жан басына шаққандағы орташа ақшалай табысы 410 088 теңгені құрады. Бұл өткен жылдың сәйкес кезеңімен салыстырғанда 14 пайызға артық. Мәліметті Ұлттық статистика бюросы жариялады.

Бұл туралы Qazaqtoday.info сайты хабарлайды.

Есепті кезеңде жан басына шаққандағы ақшалай шығыс орта есеппен 358 584 теңге болды. Ал тұтынуға пайдаланылған табыс 362 900 теңгеге тең.

Халықтың ақшалай табысының 72,7 пайызы еңбек қызметінен түскен кірістерге тиесілі. Оның ішінде 64,6 пайызы – жалдамалы жұмыстан, 8,1 пайызы – жалдамалы емес жұмыстан түскен табыс. Әлеуметтік трансферттердің үлесі 24,2 пайызды құрайды.

Ақшалай шығыстардың 90,7 пайызы тұтыну шығыстарына жұмсалған. Оның ішінде азық-түлік тауарларына – 50,5 пайыз, азық-түлік емес тауарларға – 19,5 пайыз, ақылы қызметтерге – 20,7 пайыз тиесілі.

Өңірлер арасында жан басына шаққандағы тұтынуға пайдаланылған табыстың ең жоғары көрсеткіші Алматы қаласында – 483 887 теңге. Одан кейін Қарағанды облысы (480 696 теңге) және Павлодар облысы (453 161 теңге) тұр. Астанада бұл көрсеткіш 451 999 теңгеге тең.

Ұлттық статистика бюросының дерегіне сәйкес, зерттеу тоқсан сайын 12 мың үй шаруашылығын қамту арқылы жүргізіледі.