Аса ауқаттыларға 3% салық: 2030 жылға дейін 29,5 млн өлімнің алдын алу мүмкіндігі
The Lancet зерттеуі: аса ауқаттыларға 3% салық 2030 жылға дейін 29,5 млн өлімнің алдын алуы мүмкін. 1% салықта көрсеткіш 15,1 млн.
сурет: istockphoto.com
Аса ауқатты адамдардың байлығына 3% салық салып, жиналған қаражатты гуманитарлық және даму бағдарламаларына бағыттау 2030 жылға дейін шамамен 29,5 млн өлімнің алдын алуы мүмкін. Бұл туралы The Lancet журналында жарық көрген жаңа зерттеуде айтылған.
Бұл туралы Qazaqtoday.info сайты хабарлайды.
Зерттеушілер табысы төмен және ортадан төмен 59 елдің 2002–2021 жылдардағы деректерін саралаған. Аталған мемлекеттерде жалпы саны шамамен 3,9 млрд адам тұрады. Содан кейін ғалымдар 2026–2030 жылдары халықаралық көмектің қысқаруы жалғаса беретін болса, түрлі салық және байлықты қайта бөлу тетіктері өлім-жітім көрсеткішіне қалай ықпал ететінін модельдеген.
Зерттеу авторларының есебінше, ресми даму көмегін қазіргі қарқынмен қысқарту 2030 жылға дейін қосымша 7,6 млн өліммен байланысты болуы ықтимал. Оның шамамен 1,4 миллионы бес жасқа толмаған балаларға тиесілі. Бұл сценарий зерттеудегі өзге нұсқаларды салыстыру үшін бастапқы көрсеткіш ретінде алынған.
Ең үлкен ықтимал нәтиже аса ауқатты адамдардың байлығына 3% салық салу сценарийінде тіркелген. Модель бойынша, бұл шара халықаралық көмекті қысқарту жалғасқан жағдаймен салыстырғанда 2030 жылға дейін шамамен 29,5 млн өлімнің алдын алуы мүмкін. Ал байлық салығы 1% болғанда көрсеткіш 15,1 млн-ға жуықтайды.
Өзге де тетіктер есептелген. Қаржы операцияларына салынатын салық шамамен 24,5 млн, ал жылдық кірісі 750 млн еуродан асатын трансұлттық компанияларға жаһандық ең төменгі салық енгізу 20,1 млн өлімнің алдын алумен байланысты болуы мүмкін. Жалпы алғанда, зерттеушілер байлықты қайта бөлудің он түрлі нұсқасын қарастырған.
Зерттеу халықаралық көмектің айтарлықтай қысқарып жатқан кезеңінде жарияланды. Euronews мәліметінше, ірі донор елдердің барлығы 2024–2025 жылдары ресми даму көмегін азайтқан, ал жалпы қысқару шамамен төрттен бірге жеткен. Бұл қаражат денсаулық сақтау, санитария, білім беру және инфрақұрылым сияқты салаларды қаржыландыруға жұмсалады.
Сонымен қатар авторлар келтірілген сандардың нақты болашақ болжамы емес екенін атап өтеді. 29,5 млн көрсеткіші — статистикалық модель нәтижесі: ол белгілі бір салық саясаты енгізіліп, жиналған қаражат даму мен денсаулық сақтау бағдарламаларына жұмсалады деген шарттарға негізделген. Сондықтан зерттеу «3% салық міндетті түрде дәл 29,5 млн адамның өмірін сақтайды» дегенді білдірмейді.
