Марқакөлде табиғи өрт сөндірілуде
Марқакөл орман шаруашылығындағы табиғи өртті сөндіруге 85-ке жуық қызметкер мен 10 техника жұмылдырылды. Жағдай бақылауда.
Сурет: Видеодан скриншот
Марқакөл орман шаруашылығында табиғи өрттің жойылуы жалғасуда. Бұл туралы Төтенше жағдайлар министрлігінің баспасөз қызметі хабарлады.
Бұл туралы Qazaqtoday.info сайты хабарлайды.
Өрт жетуі қиын аймақта тұтанған. Оны сөндіруге орман күзеті мен ТЖМ бөлімшелерінің күштері жұмылдырылған.
Ведомство мәліметінше, өртке қарсы күреске орман күзеті мен ТЖМ-нің 85-ке жуық қызметкері, 10 бірлік техника, «Қазавиаорманқорғау» қызметкерлері, сондай-ақ ТЖМ-нің «Қазавиақұтқару» АҚ-ның екі тікұшағы тартылған.
Сонымен қатар, жеке құрамды жеткізу және ахуалды бақылау мақсатында ормандарды авиациялық қорғау шеңберінде тағы бір тікұшақ пайдаланылуда.
Өртті сөндіру жұмыстары жалғасып жатыр. Министрлік өкілдерінің айтуынша, жағдай толық бақылауда.
