Президент Мәдениет және ақпарат министрін қабылдады
Президент Қасым-Жомарт Тоқаев Мәдениет және ақпарат министрі Арман Қырықбаевты қабылдап, министрлік жұмысының басым бағыттарын айқындады.
Мемлекет басшысы Қасым-Жомарт Тоқаев Мәдениет және ақпарат министрі Арман Қырықбаевты қабылдады. Кездесу барысында Президент министрлік қызметінің басым бағыттарын белгілеп, ведомствоға бірқатар нақты міндеттер жүктеді.
Бұл туралы Qazaqtoday.info сайты хабарлайды.
Соның ішінде, мәдениет пен креативті индустрияны дамыту, тарихи-мәдени мұраны сақтау және кеңінен насихаттау жұмыстарын күшейту тапсырылды. Қазақстан мәдениетін халықаралық деңгейде дәріптеудің маңыздылығы да атап өтілді.
Мемлекеттік ақпараттық саясат мәселелеріне ерекше назар аударылды. Президент отандық ақпарат кеңістігін жандандыру, заң жобалау жұмысын заманауи цифрлық тәуекелдерді ескере отырып жетілдіру қажеттігін айтты.
Бұдан бөлек, Мемлекет басшысы қоғамдық келісімді нығайту жұмыстарын жалғастыру және жастардың жасампаз әлеуетін жүзеге асыруына жағдай жасау жөнінде де міндеттер қойды.
