Астанада подъездде дәрет сындырған ер адам 10 тәулікке қамалды
Астанада подъезде дәрет сындырған ер адам 10 тәулікке қамалды. Сот оны ұсақ бұзақылық үшін кінәлі деп таныды.
Сурет: Видеодан кадр
Астанада көпқабатты үйдің подъезінде терезеден сыртқа дәрет сындырған ер адам 10 тәулікке әкімшілік қамауға алынды. Бұл туралы Qazaqtoday.info сайты хабарлайды.
24 тамызда Астананың мамандандырылған ауданаралық әкімшілік соты қоғамдық орында тәртіп бұзған азаматқа қатысты үкім шығарды. Бұған дейін әлеуметтік желілерде ер адамның подъезде терезеден сыртқа дәрет сындырғанын көрсететін видео тараған еді.
Сот отырысында азамат кінәсін толық мойындап, істегеніне өкінетінін білдірді. Оның кінәсі іс материалдары мен бейнежазба арқылы да дәлелденді.
Сот шешімімен ер адам ҚР ӘҚБтК-нің 434-бабының 1-бөлігі («Ұсақ бұзақылық») бойынша кінәлі деп танылды. Аталған бап 20 АЕК мөлшерінде айыппұл, 20-дан 60 сағатқа дейін қоғамдық жұмыстарға тарту немесе 5-тен 15 тәулікке дейін әкімшілік қамауға алуды көздейді.
Сот құқық бұзушылықтың сипатын, азаматтың қоғамға деген құрметсіздігін және әрекеттің әлеуметтік желілерде жария болғанын ескеріп, оған 10 тәулік әкімшілік қамау жазасын тағайындады.
