Орал тұрғыны әлеуметтік желіде балағат сөз айтқаны үшін 5 тәулікке қамалды
Орал тұрғыны Асхат Құмаров әлеуметтік желіде балағат сөз айтқан видеосы тарағаны үшін 5 тәулікке қамауға алынды. Полиция интернеттегі құқық бұзушылықтарға мониторинг жүргізетінін ескертеді.
Фото: Видеодан скрин
Орал қаласының 30 жастағы тұрғыны Асхат Құмаров әлеуметтік желіде тараған бейнежазбасында балағат сөздер қолданғаны үшін әкімшілік жауапкершілікке тартылды. Сот шешімімен ол 5 тәулікке қамауға алынды, деп хабарлайды Qazaqtoday.info сайты.
Полиция департаментінің мәліметінше, тәртіп сақшылары әлеуметтік желілерге мониторинг жүргізу барысында өзге азаматтарға қатысты әдепсіз сөздер айтылған бейнежазбаны анықтаған. Жүргізілген шаралар нәтижесінде бейнежазбаның авторы — Орал қаласының тұрғыны Асхат Құмаров екені анықталды.
Полиция департаментінің хабарлауынша, сот құқық бұзушыны 5 тәулік мерзімге әкімшілік қамауға алған. Тәртіп сақшылары интернет-кеңістігінде құқық бұзушылықтарды анықтау және жолын кесу мақсатында тұрақты мониторинг жүргізілетінін, заң талаптарын бұзғандардың міндетті түрде жауапқа тартылатынын ескертеді.
