Бішкекте мешітте жалған қайыр сұраған әке: баласы сау болып шықты
Бішкекте мешітте баласының тамағында тесік бар деп қайыр сұраған әке өтірік айтқаны анықталды. Сәби сау, полиция әкімшілік хаттама толтырды.
Сурет: politico.kz
Бішкектегі мешіттердің бірінде баласының ауыр науқас екенін айтып, қайыр сұраған ер адамның ісі тексерілді. Құқық қорғау органдары оның айтқандарының жалған екенін анықтады. Бұл жағдай әлеуметтік желіде тараған видео арқылы белгілі болды, деп хабарлайды Qazaqtoday.info сайты.
Видеода қолында сәбиі бар ер адам намаз оқып жатқан жамағаттан ақша сұрап, баласының тамағында тесік бар екенін, емдеуге қомақты қаражат қажет екенін айтқан. Оның сөзіне сенген бірнеше адам есепшотқа ақша аударған.
Алайда желі қолданушылары бұл азаматтың қаладағы бірнеше мешітті аралап жүргенін байқап, күдіктенген. Полиция тексеріс барысында 1988 жылы туған ер адамды анықтап, оның отбасы тұратын жерге барып, баланың денсаулығын тексерген.
Тексеру нәтижесінде сәбидің дені сау екені, әкесі айтқан аурулар мен «тамақтағы тесік» расталмағаны белгілі болды. Сондай-ақ отбасында баланың ауруы туралы ешқандай медициналық құжат табылмаған.
Жиналған материалдар әрі қарай қарау үшін әлеуметтік қорғау органдарына жіберілді. Жалған ақпарат таратқан азаматқа Қырғыз Республикасының заңдарына сәйкес әкімшілік хаттама толтырылды.
Бішкек полициясы азаматтарды қайырымдылық жасауда сақ болуға, көмек сұраған адамның мәліметтері мен ресми құжаттарын тексеруге шақырады.
