Астанада автобус жарықтандыру бағанын қағып, 20 метр сүйреп кетті
Астанада автобус жарықтандыру бағанын қағып, 20 метр сүйреп кетті. Жолаушылар мен жүргізуші зардап шеккен жоқ. Жүргізуші әкімшілік жауапкершілікке тартылды.
Сурет: turkystan.kz
Астанада қоғамдық көлік жүргізушісі рөлге ие бола алмай, жарықтандыру бағанына соғылып, оны шамамен 20 метрге сүйреп кеткен. Бұл оқиға 20 тамыз күні Ардагерлер көшесінде болған, деп хабарлайды Qazaqtoday.info сайты.
Әлеуметтік желідегі куәгердің сөзінше, жолаушылар аман қалған. Ол: «Автобус бағанды қағып, шамамен 20 метр сүйреп кетті. Мұндай жағдай қалай болуы мүмкін? Жолаушылар зардап шекпеген шығар деп үміттенемін. Жедел жәрдем ешкімді алмай кетті, жүргізуші де автобустың жанында жүрді, ол да зардап шекпеген», – деп жазған.
Полиция мәліметінше, Yutong маркалы бағыттық автобустың жүргізушісі Ардагерлер көшесімен келе жатып, басқаруды жоғалтып, жарықтандыру бағанына соғылған. Оқиға салдарынан зардап шеккендер жоқ. Жүргізуші әкімшілік жауапкершілікке тартылды.
