Маңғыстаудағы Құлжан кен орнындағы өрт сөндірілді: зардап шеккендер жоқ

Сурет: azattyq-ruhy.kz

Маңғыстау облысындағы Құлжан кен орнында болған өрт кәсіпорын қызметкерлерінің күшімен сөндірілді. Оқиға салдарынан зардап шеккендер жоқ, алайда өрттің шығу себебі әзірге анықталмаған, деп хабарлайды Qazaqtoday.info сайты.

Әлеуметтік желіде Құлжан кен орнының үстін қою қара түтін жапқан видео тарады. Кадрлар 7 тамызда Боранқұл ауылындағы нысан аумағында түсірілген. Желі қолданушылары түтіннің көлемі мен түсіне қарап, резервуарлар паркі өртеніп жатыр деген болжам айтқан. Видео авторы нысанның шетелдік иелерге тиесілі екенін және ауылға экологиялық проблема тудырып отырғанын да жеткізді.

Сонымен қатар, видеоға пікір білдірген бір азамат бақылаушы органдардың жұмысын сынға алып, нысанда өрт сөндіру техникасының жеткіліксіз болуы мүмкін екенін айтты. Оның пікірінше, егер мұнай резервуарлары өртенсе, жақын маңдағы елді мекен үшін ауыр салдар туындауы мүмкін еді.

Алайда Маңғыстау облысының Төтенше жағдайлар департаменті өз бөлімшелерінің өрт сөндіруге жұмылдырылмағанын хабарлады. Құлжан кен орнында жұмыс істейтін «Meerbusch» ЖШС қызметкерлері өртті өз күштерімен сөндірген. Компания оқиғаның болғанын растады, зардап шеккендер жоқ.

Әзірге кәсіпорын өрттің неден шыққаны және нақты ненің жанғаны туралы толық ақпарат бермеді.