Қасым-Жомарт Тоқаев Тәжікстан Президентімен кездесті

Қазақстан Президенті Қасым-Жомарт Тоқаев Тәжікстан Президенті Эмомали Рахмонмен кездесті, деп хабарлайды Qazaqtoday.info сайты.

Мемлекет басшысы тәжік әріптесіне «Болашақ ойындары – 2026» халықаралық көп спорт түрлерінен тұратын турнирдің ашылу салтанатына құрметті қонақ ретінде қатысқаны үшін алғыс білдірді.

Кездесу барысында президенттер стратегиялық серіктестік пен одақтастық рухында тұрақты дамып келе жатқан қазақ-тәжік қарым-қатынастарының ағымдағы деңгейін жоғары бағалады. Саяси диалогтың, сондай-ақ екі елдің үкіметтері мен кәсіпкерлер арасындағы белсенді байланыстардың маңыздылығы атап өтілді.

Тараптар сауда-экономикалық ынтымақтастықты одан әрі кеңейтуге, көлік-логистика және энергетика салаларындағы өзара іс-қимылды дамытуға, бұрын қол жеткізілген уағдаластықтарды жүзеге асыруға ерекше назар аударды.

Мемлекет басшылары өңірлік және халықаралық күн тәртібіндегі өзекті мәселелер бойынша пікір алмасып, алдағы көпжақты іс-шаралардың кестесін талқылады.