Тоқаев Мирзиёевті туған күнімен телефон арқылы құттықтады
Қасым-Жомарт Тоқаев Шавкат Мирзиёевті туған күнімен телефон арқылы құттықтап, екі ел арасындағы стратегиялық серіктестік пен ынтымақтастықты нығайту мәселелерін талқылады.
Қазақстан Президенті Қасым-Жомарт Тоқаев Өзбекстан Президенті Шавкат Мирзиёевке телефон соғып, оны туған күнімен құттықтап, бауырлас өзбек халқының игілігі жолындағы жауапты мемлекеттік қызметіне табыс тіледі, деп хабарлайды Qazaqtoday.info сайты.
Кездесу барысында Тоқаев Мирзиёевтің данагөй басшылығының арқасында Өзбекстан әлеуметтік-экономикалық даму мен халықаралық беделді арттыруда зор жетістіктерге жетіп, жан-жақты реформалар арқылы тұрақты дамып келе жатқанын баса айтты. Сондай-ақ екі ел арасындағы достық пен тату көршілік рухындағы стратегиялық серіктестік пен одақтастық қарым-қатынасты нығайтуға қосқан елеулі үлесін атап өтті.
Тараптар қазақ-өзбек ынтымақтастығының қазіргі қарқынына тоқталып, сауда-экономикалық, көлік-логистикалық және мәдени-гуманитарлық салалардағы байланысты тереңдету перспективаларын сөз етті. Сонымен қатар президенттер өңірлік және халықаралық күн тәртібіндегі өзекті мәселелер бойынша пікір бөлісіп, алдағы кездесулердің жоспарын талқылады.
