Иран парламент төрағасы: мұнай сатпасақ, ешкім сатпайды

Сурет: tengrinews.kz

Иран Парламентінің төрағасы Мұхаммед Багер Ғалибаф егер Иранның өзі мұнай сата алмаса, аймақта ешкімнің мұнай сатуына жол берілмейтінін мәлімдеді. Ал Иран Сыртқы істер министрі Аббас Аракчи АҚШ-тың ықтимал агрессиясына қатаң жауап беруге дайын екенін білдірді, деп хабарлайды Qazaqtoday.info сайты.

Ғалибаф өзінің Х (Twitter) парақшасында жариялаған жазбасында: «Біз мұнай сатпайтын аймақта ешкім мұнай сатпайды. Егер біздің қауіпсіздігіміз қамтамасыз етілмесе, ешбір инфрақұрылым нысаны қауіпсіз болмайды», – деп жазды. Ол сондай-ақ аймақтағы қауіпсіздікті қамтамасыз ету тек АҚШ әскери күштері болмаған жағдайда ғана мүмкін екенін атап өтті. «Осы қақтығыстың теңдеуі: «не бәрі, не ешкім!» деген ережеге саяды», – деді Иран парламентінің спикері.

Иран Сыртқы істер министрі Аббас Аракчи де өз парақшасында АҚШ президенті Дональд Трамптың қауіпті мәлімдемелеріне жауап берді. «Біздің қорғаныс доктринамыз айқын: көзге көз. Иранға қарсы кез келген агрессия, соның ішінде инфрақұрылымға шабуыл, шешуші, күшті және табанды жауапқа тап болады», – деп жазды ол. Аракчи АҚШ-тың одақтастарына да ескерту жасады: «Кез келген тарап мұндай агрессияға қандай да бір нысанда қатысса немесе оған қолдау көрсетсе, біз үшін заңды нысана болып саналады».

Бұған дейін АҚШ президенті Дональд Трамп Ормуз бұғазында шабуылға ұшыраған әрбір кеме үшін Иранның көпірі немесе электр станциясы жойылатынын мәлімдеген болатын. Иран жауап ретінде бүкіл аймақ бойынша инфрақұрылым мен энергетика нысандарына соққы беретінін ескертті. Сонымен қатар, хуситтер Қызыл теңіздегі мұнай айналып өту маршрутын жауып тастады, нәтижесінде танкерлер кері бұрыла бастады. Енді Парсы шығанағы елдерінен мұнай сату мүмкін емес дерлік.