Қазақстанда 25 тамыздан бастап жүргізуші куәлігін тоқтатудың жаңа ережелері күшіне енеді

Сурет: tengrinews.kz

25 тамыздан бастап Қазақстанда көлік құралдарын басқару құқығын тоқтату ережелері өзгереді. Жаңа нормалар 65 жастан асқан жүргізушілерге, мүгедектігі бар жүргізушілерге, сондай-ақ мас күйінде көлік жүргізу бойынша қылмыстық істері айыптау үкімі шығарылмай тоқтатылған адамдарға қатысты болады, деп хабарлайды Qazaqtoday.info сайты.

Түзетулер «Жол қозғалысы туралы» Заңға енгізілді. Жүргізушінің қандай жағдайларда куәліктен айырылатынын және оны қалай қалпына келтіруге болатынын қарастырайық.

65 жастан асқан жүргізушілер мен мүгедектігі бар адамдарға арналған медициналық қарау

65 жастан асқан жүргізушілер, сондай-ақ мүгедектігі бар жүргізушілер мерзімді түрде қайта медициналық қараудан өтуі керек. 25 тамыздан бастап тек медициналық қараудың өзі ғана емес, оның нәтижелерінің жол қозғалысы саласындағы цифрлық жүйеде болуы да маңызды болады. Егер жүйеде жүргізушінің денсаулығына байланысты көлік басқаруға жіберілгені немесе медициналық қарсы көрсетілімдері бар екені туралы мәлімет болмаса, бұл басқару құқығын тоқтатуға негіз болады. Жүйеге көлік басқаруға рұқсат етілген жүргізушілер туралы да, жүргізуге қарсы көрсетілімдері анықталғандар туралы да мәліметтер енгізіледі.

Мас күйінде көлік жүргізу бойынша жабылған іс куәлікті сақтап қалмайды

Екінші жаңа негіз мас күйінде көлік құралын басқарғаны үшін қылмыстық жауапкершіліктен босатылған жүргізушілерге қатысты. Мұндай жағдайларда қылмыстық іс айыптау үкімінсіз тоқтатылуы мүмкін. Мысалы:

• кешірім бойынша;
• қылмыстық жауапкершілікке тартудың ескіру мерзімінің өтуіне байланысты;
• егер адам тыйым салынған әрекетті есі дұрыс емес күйде жасаса және оған мәжбүрлі ем қажет болмаса;
• егер уәкілетті орган иммунитеті бар адамды қылмыстық жауапкершілікке тартуға келісім бермесе;
• егер адам Қылмыстық кодексте көзделген негіздер бойынша қылмыстық жауапкершіліктен босатылуға жататын болса.

Мұндай негіздерге Қылмыстық кодекс, атап айтқанда, белсенді өкіну, процессуалдық келісім шарттарын орындау, заңда көзделген жағдайларда татуласу және кәмелетке толмағандарды жауапкершіліктен босатуды жатқызады. 25 тамыздан бастап аталған негіздердің бірі бойынша қылмыстық істі тоқтату басқару құқығын сақтап қалуға мүмкіндік бермейді. Негіз болып заңды күшіне енген қылмыстық істі тоқтату туралы қаулы табылады. Осыдан кейін уәкілетті орган басқару құқығын тоқтатады және ақпаратты цифрлық жүйеге енгізеді.

Сот шешімі қажет пе?

Жаңа негіздер бойынша басқару құқығын тоқтату туралы жеке сот шешімі қажет болмайды. Шешімді уәкілетті мемлекеттік орган белгіленген тәртіппен қабылдайды. Рәсімнің нақты қалай жүретінін уәкілетті органның өзі анықтайды.

Басқару құқығын қалай қалпына келтіруге болады

Егер басқару құқығы медициналық мәліметтердің болмауына байланысты тоқтатылса, цифрлық жүйеде жүргізуге қарсы көрсетілімдердің жоқтығы туралы қорытынды пайда болғаннан кейін оны қалпына келтіруге болады. Мас күйінде көлік жүргізу бойынша қылмыстық іс жабылғаннан кейін басқару құқығы тоқтатылған жүргізушілер сегіз жыл күтуіне тура келеді. Осы мерзім өткен соң медициналық қараудан өтіп, жол жүрісі ережелерін білу бойынша теориялық емтихан тапсыру қажет.

Біз бұған дейін Қазақстанда жүргізуші куәлігінен қандай жағдайларда айырылуға болатынын жазғанбыз. Қазақстан жолдарында қытайлық автокөліктер көбейіп барады. Бренд атауларын дұрыс айтуды білесіз бе? Біздің «Қытайлық автокөліктер әлемі» арнайы жобамызға кіріңіз – барлық маркалар, брендтер және өндірушілер туралы толық ақпарат!