Азия ойындарына алдын ала құрам айқындалды

Сурет: olympic.kz

15 шілдеде Будапеште (Венгрия) грек-рим күресінен халықаралық рейтингтік турнир басталады. Бұл жарыс Қазақстан құрамасы үшін ерекше маңызды, өйткені оның қорытындысы бойынша 2026 жылғы Азия ойындарына қатысатын балуандардың басым бөлігі анықталады, деп хабарлайды Qazaqtoday.info сайты.

Грек-рим күресінен ұлттық құраманың бас бапкері Қонысбек Кәрімұлы Olympic.kz сайтына берген сұхбатында команданың дайындығы, құрамдағы өзгерістер және алдағы жоспарлар туралы айтып берді. Оның айтуынша, Венгрияға негізінен Азия ойындарына қатысатын балуандар жіберіліп отыр, бұл олардың дайындығын бағалауға мүмкіндік береді.

Құрамда бірқатар өзгерістер бар. Демеу Жадыраев бұған дейін 77 келіде күресіп келсе, енді 82 келіге ауысты. Ал Тимур Оспанов жарақатына байланысты Будапешттегі жарысқа қатыса алмайды. Ол Германияға ем қабылдауға барады, кейін Дортмундтағы турнирде белдеседі.

Будапештке бармайтын балуандар Германиядағы Гран-при турниріне қатысады. Қазір Түркістанда 29 маусым мен 15 шілде аралығында халықаралық бірлескен оқу-жаттығу жиыны өтіп жатыр. Оған Түркия, Марокко және Ресей құрамалары келген. Жалпы саны 150-ге жуық балуан бірге жаттығып, тәжірибе алмасып жатыр.

Азия ойындарына баратын алдын ала тізім жасалған. Демеу Жадыраев 77 келіде, Ислам Евлов 97 келіде, Олжас Сырлыбай 130 келіде белдеседі. 67 келіде үш балуан бақ сынайды, қазіргі көшбасшы — Мейіржан Шермаханбет. 60 келіде Ербол Камалиев пен Ернұр Фидахметовке мүмкіндік беріліп, Будапештегі нәтижелеріне қарай Азия ойындарына біреуі іріктеледі. Ал осы салмақтағы негізгі көшбасшы Айдос Сұлтанғалиев елімізде өтетін әлем чемпионатына арнайы дайындалуда.

Венгриядағы жарыстан кейін спортшылар аз уақыт тынығып, 8–26 тамыз аралығында Алматы облысының таулы аймағында оқу-жаттығу жиынына қатысады. Онда жалпы дене дайындығына басымдық беріледі. Кейін қайтадан Түркістанға оралып, Азия ойындары алдындағы негізгі дайындықты жалғастырады.