«Қазақстан қиын кезде де керек» – танымал блогер Бибісара Асаубаеваның пікірін сынады

Журналист, блогер Абзал Ибрашев Бибісара Асаубаеваның жалақы туралы пікірін сынға алды, деп хабарлайды QazaqToday.info ақпарат порталы.

Ол шахматшы Бибісара Асаубаеваның жалақы мәселесіне қатысты айтқан пікіріне өз көзқарасын білдірді.

Ол спортшының мемлекеттік қолдау мен қаржыландыруға қатысты мәлімдемесін сынға алып, ел намысын қорғап жүрген азаматтардың ең алдымен патриоттық ұстанымды алға қоюы керектігін айтты.

Абзал Ибрашевтің пікірінше, өзі ақпарат саласында бірнеше жылдан бері еңбек етіп келе жатқанымен, мемлекеттік органдардан қаржылай көмек сұрамаған. Оның сөзінше, Қазақстанның әр өңірін аралап, түрлі жобаларды өз қаражатына жүзеге асырып жүр.

«Бізде патриотизм басым болуы керек. Еліміз жақсы кезде ғана емес, қиын сәтте де қолдау көрсету маңызды», – деді блогер.

Ол сондай-ақ белгілі тұлғалардың қоғамдық пікір қалыптастырудағы жауапкершілігі жоғары екенін айтып, мұндай мәселелерде салмақты көзқарас қажет екенін жеткізді.

Материалда блогердің жеке пікірі берілген. Бибісара Асаубаеваның бұған қатысты ұстанымы немесе жауабы жарияланған жағдайда ақпарат толықтырылуы мүмкін.