Қазақстан Ұлттық банкі базалық мөлшерлемені 1 пайыздық тармаққа, яғни 17%-ға дейін төмендету туралы шешім қабылдады. Бұл қадам ұлттық валюта бағамына қысқа мерзімді түзету енгізіп, теңгенің уақытша әлсіреуіне алып келуі мүмкін деп хабарлайды Qazaqtoday.info сайты.
Qazaq Expert Club тең құрылтайшысы Бауржан Шурмановтің айтуынша реттеушінің бұл шешіміне бірқатар макроэкономикалық алғышарттар негіз болды.
Атап айтқанда, мамыр айында жылдық инфляцияның 10,4%-ға дейін баяулауы, халықтың инфляциялық күтулерінің 12,4–12,7% деңгейінде тұрақтануы және 2026 жылға арналған ЖІӨ өсімі болжамының 4,5–5,5%-ға дейін жақсаруы оң фактор ретінде бағаланды.
Сарапшылардың пікірінше, базалық мөлшерлеменің төмендеуі теңгедегі қаржы құралдарының кірістілігін азайтып, инвесторлар үшін олардың тартымдылығын төмендетеді. Демалыс маусымының басталуы және Ұлттық қордан трансферттер көлемінің азаюы аясында алдағы айда доллар бағамы 498 теңгеге дейін жетуі ықтимал.
Алдағы уақытта Ұлттық банк «күту және бақылау» ұстанымын сақтайды деп күтілуде. Реттеуші ақша-несие саясатының қалыпты қатаң шарттарын сақтау қажеттігін атап өтті, себебі тұрғын үй-коммуналдық қызметтер тарифтерінің, жанар-жағармай бағасының өсуіне байланысты инфляциялық тәуекелдер әлі де сақталуда.
Базалық мөлшерлеме бойынша келесі шешім 24 шілдеде жарияланады. Осы уақытқа дейін реттеуші нарықтың реакциясы мен инфляция динамикасын бағалап, ақша-несие саясатын одан әрі жұмсартудың орындылығы туралы қорытынды жасайтын болады.
