Павлодар-Астана тасжолында бетон плиталар көтеріліп, бірнеше көлік зақымданды
Павлодар-Астана ақылы тасжолында бетон жабыны көтеріліп, бірнеше көлік зақымданды. Жүргізушілер жол сапасына наразы болып, жол ақысын алып тастауды ұсынды.
Сурет: sn.kz
Павлодар – Астана бағытындағы ақылы автожолда төтенше жағдай тіркелді. Спутник ауылы маңындағы учаскеде жолдың бетон жабыны көтеріліп, салдарынан бірнеше автокөлікке зақым келген деп хабарлайды Qazaqtoday.info сайты.
Әлеуметтік желілерде тараған видеолар мен фотосуреттерде жол жабынының деформацияға ұшырап, бір бөлігінің көтеріліп кеткені анық байқалады. Оқиға куәгерлерінің айтуынша, мұндай кедергі жоғары жылдамдықпен келе жатқан көліктер үшін аса қауіпті жағдай тудырған.
Желі қолданушылары ақылы жолдың сапасын сынға алып, жауапты мекемелерден түсініктеме талап етуде. Олар жолдың ақылы болғанына қарамастан, оның жағдайының уақтылы қадағаланбайтынына наразылық білдіріп жатыр. Сондай-ақ кейбір жүргізушілер ақау толық жөнделгенше аталған учаскеде жол жүру ақысын уақытша алып тастауды ұсынды.
Қазіргі уақытта оқиғаға қатысты жауапты мемлекеттік органдар мен жол қызметтері тарапынан ешқандай ресми мәлімдеме жасалған жоқ. Жүргізушілерге аталған бағытта қозғалыс кезінде барынша сақ болып, жылдамдық режимін сақтауға кеңес беріледі.
